- 110 -

1514. Januar 9.

Wir Cazymir vonn Gottes gnaden Herrczog zue Teschen vnnd Großglogau etc. Haubtman inn Ober ynnd Nieder Schlesien, Bekennen hiemit vor Yedermenniglichen, Welche diesenn brief sehenn oder lesenn horen werden, Demnach Ain striet vnnd wiederwielle gewesen zwischenn dem Durchlauchten hochgebornnen Fursten vnnd herrn, Herrn Valentin Herrczogen zu Troppau vnndt Rattibor S. F. G. Aines, Vnnd dem Wolgebornnen Herrn herrn Georgen vonn Schellenbergk vnnd Kosticz S. G. Anndersthails, Vmb die Obergericht des halbenn guets Baurwicz, Wailandt F. G. Herrczog Wenczeln zu Rybna gehörig, Alls habenn wir die Parten mit baiderseits guettem wiellen Verglicchenn hernach folgender gestallt, Allso, Das herr vonn Schellenberg sein recht, so er bei dem Furstenrecht vnnd Tagefart, so zwischen dem Jungfrauen Stiefft des Closters Rattibor zu Bresla angeordnet, zuehaben vermainet, zue obgeschriebenem Anthail guetwillig gelassenn, Vnnd dasselbe Irer f. g. herrczogin zu Oppelln vnnd Rattibor vnnd derselben Erben abgetretten, Im Fall aber gott der Allmechtige Ire F. G. ohne Erbenn vnnd Erbnehmen abfodernn sollte, So soll solche Obergericht des halbenn guets Baurwicz obgeschriebenen Anntheils wiederumb stammen vund fallenn an Wolgemeltenn herrn vonn Ssellnberg S. G vnnd derselbenn Kinder vnnd Erbenn, Der oder sie sollenn die Obergerichte vber gancz Baurwicz nun vnnd zue Ewiegenn Zeitenn habenn. Was aber des Stieffts Recht vnnd einkommen belanget, Soll weder der Herrczog zue Rattibor nach Herr vonn Schellnberg dorein gar nicht greiffen nach eintrag thun, nun vnnd zue kunftigen Zeiten. Zue Vhrkundt habenn wir Herrczoge alls vnnderhenndler obgeschriebener sachenn vnnser Furstlich Secret anhengen lossenn. Gegebenn zu Troppaw Monntag nach der heiligenn Drei Konige tag A°1514.

Nach einer alten Abschrift.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.